أحبك حُبٍ ما يموت

السلام عليكم
شخباركم

راح انقل لكم قصه قريتها وعجبتني

عنوانها.. أحبك حُبٍ ما يموت

اتمنى تعجبكم

الحلقه الأولى..
الجو كان شديد الحرارة ..والريح عاصفه وحاره ومغبره ..في موجة جويه عاصفه مرت بها البلاد لاول مره منذ ست سنوات..وبعد هالعاصفه اللي خربت البيوت الصغيره واقتلعت الاشجار ..واجتثت اعمدة الانوار من الشارع..هطل المطر اخيراً وارتوت بوظبي بكبرها بأمطار الرحمه في امطار لم تشهدها الدوله منذ امد طويل..
في هذه الاثناء لم يشغل ظبيه أي شي عند دراستها..وتمت قاعده في حجرتها ما هزها منظر الجو وما حبت تضيع أي لحظه على نفسها من دراستها..وكل شوي تدخل عليها امها عشان تغير جو وتنزل مع اهلها عشان تشوف المطر كيف بلل الدنيا بعد جفاف دام سنين طويله...
ام سيف: ظبيه يا بنتي انزلي وشوفي الدنيا شوفي الرحمه ..يا بنتي الناس مب مصدقه وتدعي ربها..
ظبيه دون ما ترفع راسها عن الكتب والاوراق اللي في ايدها وكأنها بتاكلها اكل..
ظبيه: اسفه يمه عندي اشياء اهم..باجر ما بيقول لي الدكتور كيف كان شكل المطر ..ولا بيسألني عن فرحة الناس ..خليني هني احسن..
ام سيف: يا بنتي ارحمي حالج والله ما يرزا هاللي تسوينه بحياتج..عيشي مثل الناس..
ظبيه: امايه فديتج عندي شغل وايد..يعلني ما خلى مب متفيجه للمطر ..ادعيلي بالتوفيق..
وقبل ما تطلع ام سيف..
ام سيف: الله يسهل عليج يا غناتي ويوفقج للي فيه الخير..ويعوضج بدل هالتعب براحه العمر كله..
وطلعت ام سيف وبقيت ظبيه بالحجره..
كان البيت الصغير اللي مكون من سبع حجر..لناس على قد حالهم مكتفين باللي الله عطاهم...غرفة ابو سيف وام سيف..وثلاث غرف نوم ثانيه لاخوان ظبيه وهم سيف وعيسى و احمد..وغرفة ظبيه وميلس الحريم وميلس الرياييل..
سيف اكبر واحد وعمره خمسه وعشرين سنه مب متزوج مخلص دراسه من جامعة الامارات..وعيسى عمره ثلاثه وعشرين مخلص دراسه في التقنيه.. وعقبه ظبيه وهي في جامعة زايد..عمرها واحد وعشرين باقي لها سنه ونص وتتخرج..واخر العنقود احمد بعده يدرس في مدرسة خليفه بن زايد العسكريه الجويه في العين..وعمره سبعة عشر سنه..وما يزورهم الا يوم الاربعاء والخميس ويوم الجمعه يرد العين...وهاي ثالث سنه له في المدرسه الجويه..وعقبها بيتخرج..
.............
المطر بعده ينزل وما وقف وابو سيف يالس يطالع من دريشة الميلس وينادي على ام سيف..
ابو سيف: يا ام سيف اختربت زراعتي عاث فيها المطر ..وغرقن الشتيلات اللي توني زراعنهن...
ام سيف تبى تسوي عمرها فاهمه وهي تمثل الانصدام: بسم الله يا بو سيف شاللي استوى بك ...
ابو سيف: سيري يا حرمه انتي ما تفهمين شي...
سيف يضحك: اها ابويه وحليلك ليكون بس خرب اللي سويته..؟؟
ابو سيف: هيه والله يا ولدي تعبي وشقايه ضاع هدر ..
ويصرخ ابو سيف فجأه..
ابو سيف: سيف سيف الحق شوف النخل طاحن ..
ام سيف مره ثانيه: أي نخل يا بوسيف.؟؟
سيف : امايه سكتي لا يفلعنا ابويه الحين...
وطلع عيسى من حجرته...
عيسى: بحياتي كلها ما شفت مثلكم عنبو اللي يشوف يقول اول مره تشوفون مطر..ياخي استهدوا بالله..
ام سيف تبي تسوي عمرها تعرف شي: ما تدري شو صار فينا يا ولدي يقول ابوك ان البرق حرق الزرع..
يفتح سيف عيونه وعيسى تم ساكت ..وابو سيف بعده يطالع الجامه ويضرب كف بكف..
انفجر سيف ضحك...وعيسى تم يطالعه واخر شي الاثنين ما قدروا يمسكون عمارهم ونقعوا ضحك..
كد
سيف مب قادر يرد على عيسى وناقع ضحك...
سيف: بطني والله ما روم ههههههههه...
ام سيف: على شوه تضحكون يالمفلع انا شاللي قلته غلط..انا بس قلت اللي ابوك قاله..
............
هدت الريح شوي وخف المطر..ودخلت ام سيف المطبخ تسوي العشا..وعقب دشت عليها ظبيه تساعدها..طبعاً حالتهم الماديه ما كانت تساعد انهم ييبون خدامه..وكل شي كان على راس ظبيه وامها من تنظيف البيت وغسيل الصحون وترتيب كل شي..وكانت ظبيه على الرغم من كل هذا ما تتأخر ابد في دراستها وعمرها ما كانت الا من المتفوقات..على الرغم من الظروف الصعبه اللي تمر فيها...
المهم حطوا العشا ويلسوا يتعشون جبن وزيتون...على الارض..في صالة البيت اللي كان شوي سقفها ويطيح عليهم من كثر ما هو متشقق ومتصدع من المطر والهوا..
عيسى: يعني ما شي اكل الا هذا..كل يوم جبن وزيتون ..عنبو لاعت جبدي والله..
سيف: احمد ربك يا عيسووه وقل الحمد لله غيرك يتمنى اللقمه تطيح ببطنه مره بالاسبوع..
عيسى: الحمدلله انا شبعت..
ام سيف: ما تعشيت يمه وين ساير.؟؟
ظبيه: اللي مب عايبنه اكلنا يدور له على بيت ثاني..
وطلع عيسى مع ان المطر ما وقف بس بعد اخف شوي..
طلعت ظبيه حجرتها وتمت تكمل فايلها وترتب اوراقها..ودخل عليها سيف..
سيف: اكيد مشغوله..
ظبيه مبتسمه: لاء بس الحين بخلص يالسه ارتب الفايل..
سيف: وعقب شو بتسوين.؟؟
ظبيه: مادري والله ما عندي أي فكره..
سيف:شو رايج نسير نشوف شي بالتلفزيون..
ظبيه: ما حب التلفزيون..ما شي يعجبني فيه..
ويدخل عيسى...متضيج..
عيسى: افف والله لين متى بنتم عايشين على هالحال..
سيف: شو فيك..؟؟
عيسى: التلفزيون مب طايع يشتغل ..جنه الريح جلعت الدش من مكانه..
سيف: يا ربي شو هالحاله..؟؟
ظبيه:عادي تحملوا مكتوب لنا هالعيشه...
وطلعوا من عند ظبيه وخلصت اوراقها ورقدت...
.............
في الجهه الثانيه كان بيت خادم اخو ابو سيف..بخير ولله الحمد وما صار به شي..لانهم كانوا ساكنين في منطقه مثل العالم والناس ..وبيوتهم مب شعبيه جديمه مثل بيت ابو سيف..كان في البيت ام مايد يالسه مع بنتها مريم ..في صالة البيت الكبير ...
مريم: وحليلهم بيت عمي اكيد طاح البيت فوقهم..
اما مايد:مب منهم من عمج الزطي..اللي بيموت عالفلس..
مايد بعصبيه: انتوا شفيكم بتموتون حش في الناس..
ام مايد: ما قلنا شي جذب..
مريم: امايه مب حب في عمي ولا في بيته..كل هاه عشان حبيبة القلب ظبيوه..
مايد: هيه حبيبة القلب ..حد عنده مانع..
ام مايد: امحق حبيبه..يا شين ما حبيت يا مايد..
وطلع مايد معصب من عند امه ومنقهر من طريقة كلامها عن بنت عمه وحبيبة القلب اللي بيموت عليها...
...............

شكلها القصة مو عاجبتكم.. بس انا بكملها.. يمكن في النهاية تعجبكم

الحلقة الثامنه...
مرت الايام وخطب سيف مريم..وحددوا موعد العرس اللي تقرر انه يكون عائلي..لان بو سيف قال ان ما فيه شده على الضيوف..المهم ان سيف كل يوم والثاني عافد بيت عمه بو مايد ومحتشر..يبي يعرس...وفي بيت بو سيف..
عيسى: ظبيه وين امي .؟؟
ظبيه: صوب الميالس يالسه تنظف..وانا بسير الحقها الحين..
عيسى: ما يسوى علينا هالعرس ..من خطب سوااف وانتوا محتشرين محد بيعرس الا ولدكم..
ظبيه: والله محد مظلوم في هالدنيا الا امايه..اللي وحليلها كبرت وما تروم تشل شغل البيت كله..
عيسى: والله انا روحه راتبي ما يكفيني وهو ياخذ اكثر عن نصه ولا جان عطيتها الباقي ويبنا شغاله...
ظبيه: يا ليتني سجلت صيفي..؟؟
عيسى: مب مشكله السنه اليايه..يالله سيري لامايه اكيد يالسه تشتغل بروحها..
وطلعت ظبية وسارت عند امها واول ما دشت الميلس لقت امها يالسه على الارض تتنفس بسرعه وحاطه ايدها على صدرها...وتتأوه..ولفت صوب كبت كبير حاطين عليه التلفزيون..وشافت انها سحبته بروحها وحركته من مكانه كامل...
ظبيه وبصوت شوي عالي: امايه ليش تسوين جي .؟؟ ليش ما تريتيني..؟؟؟ ليش شليتيه بروحج..امايه انتي كبيره مب حمل هالاشياء...
ام سيف تتنهد بصعوبه: يالله يا ظبيه كملي الباقي لين ما يرد لي نفسي شوي...
وقامت ظبيه تحاول تنظف تحت الكبت..وتمسح الغبار..ويوم خلصت جربت انها تسحب الكبت مكانه...وما قدرت حتى تحركه شبر ولفت على امها اللي قامت تنظف الدرايش وتمسحنه من الغبار..
ظبيه بغرابه: امايه انتي كيف سحبتيه بروحج..انا ما رمت احركه حركه وحده..
ام سيف: ظبيه يالله اشتغلي وخلي الهذربه ورانا شغل وايد..
...............................
في بيت بو مايد..مايد يالس ويا مريم يسولفون في غرفة مريم...
مايد: يا حيك يا سيف والله ..
مريم: على شو ؟؟
مايد: انتي تبينه وهو يبيج..
مريم: وانت ترمس عن ظبيوه الخبله..والله ما ادري شو تحب فيها...
مايد: حرام عليج يا مريم والله اني احبها من كل قلبي فوق ما تتصورين..وليش ترمسين عنها جي..انتي ما تحبينها..؟؟
مريم: والله احبها واشفق عليها بنفس الوقت..بنت كتومه وقلبي يعورني عليها..تحب الصمت وتكره تفضفض لحد..احس قلبها كاتم على كل هموم الدنيا..
مايد: افديتها يا ربي والله خاطري افتح قلبي لها واقول شوفي يا ظبيه ..محد هني غيرج..واراويها كل الجروح واقول لها ترا انتي اللي تجرحينه وانتي اللي تداوينه ...
مريم: الله الله يالشاعر الله عليك..من متى وانت هيمان لهالدرجه...
مايد: ويييييه من زمان..
مريم: اوكي يالله سمعني شي من قصيدك..
مايد: بسمعج شي كتبته فيها يوم شفتها ونحن سايرين عزبة ابويه الله يرحمه..
مريم: يالله انزين ..
مايد: يا حسين اللون والنظره..يا قمر في حزة ظهوره..يا ذهب يا زهرة الاسره..لي شذاها تنفح عطوره..يا بدر خمسه على عشره..لي ينير الكون من نوره..
مريم: صح لسانك يا الشاعر ما فيك حيله يا ولد خادم..
مايد: احم احم صح بدنج اختي الغاليه..سمعينا قصيدج..
مريم: ههههههه وانا شعرفني بالقصيد يا مايد..جانك تبي القصيد سير عند شاعر العربان كلها سيف بن سالم ولد عمك..
مايد: هيه من حقج ..اذا السالفه فيها سيف..اكيد بيكون شاعر حتى لو ما يخصه بالشعر..
مريم: يالله خل عنك الغيره والهذربه قم يالله العشا يأذن بسير اصلي..
وطلع مايد من عند مريم اخته وسار صوب حجرته..وطلع كل الالبومات..ويلس يطالع صوره ويا سيف وعيسى يوم كانوا صغار وبسرعه تم يقلب ويلس يطالع صورته وياغزال حياته..يوم كان ويا ظبيه..ويالس يطالع الصوره بكل لهفه وشوق.."اااه يا ظبيه افديت قلبج..متى بتحسين فيني ..يا ليتني ادري باللي في قلبج بس..وادري ليش عايفتني..ااه افديت روحج والله "وضم الصوره لصدره وتم يتنهد.." والله بعدها هالنظره الغريبه الصامته الكئيبه في عينج من وانتي طفله لليوم.."
ورد الالبوم تحت الكتب واوراق الشغل وسار المسيد يصلي العشا..
.................................
في غرفة حمدان..يالس يرتب الاوراق ويعدل ويوقع على بعض الملفات...دخلت عليه عليا ويلست عنده..
عليا: حمدان فاضي..؟؟
حمدان: يعني ..
عليا: زين انا برمس وانت اسمعني..
حمدان مبتسم : اوكي..
عليا: حمدان ما تبي تعرس..؟؟
رفع راسه وتم يطالعها..باستغراب..
حمدان: ليش عندج عروس..؟؟
عليا: محد معين انت اتخير ونحن بنخطب لك..
حمدان: مب وقته انا الحين ما ابي اخذ وحده واظلمها ..انا ريال مب فاضي للبيت وراي اشغال ما تنعد..
عليا: بس تعرف انا في بالي وحده والله بتعيشك احلى عيشه..هاديه وما تشتكي ابد وفوق كل هذا جامعيه وربة بيت سنعه..وصبوره لابعد الحدود..
حمدان: الله الله..منو هاي الكامله والكمال لله..؟؟ما شي بنت في هالزمن جي..
عليا مبتسمه: بلى ظبيه بنت جيراننا..
تغيرت ملامح حمدان وعقد حياته وتم يطالعها باستغراب وهد اللي في ايديه..
حمدان: شو تقولين انتي..؟؟
عليا: ظبيه بنت سالم بو سيف..
حمدان: شو يالسه تخرفين انتي ..عليووه خل عنج السوالف البطاليه..انا فخور ما خذيتها بنت خالتي بنت الحسب والنسب....تبيني اخذ وحده بنت واحد حافي منتف يموت عالدرهم...
عليا وملامحها بدت عليها العصبيه: انت اللي شو يالس تقول..؟؟انا ما اعرف كيف فتحت معاك الموضوع ما توقعت تفكيرك يوصل لهالدرجه...
وطلعت من عنده وهي متضايقه بتنفجر من القهر..
عليا انسانه بمعنى الكلمه حساسه وطيبه مثل امها المرحومه..ما غرتها الدنيا ولا غرها مال ابوها..كانت متواضعه لابعد الحدود..وربت خواتها الصغار على هالتفكير ..ولا خلتهن يفكرن انهن شي فوق الناس...
....................................

الحلقة التاسعة...
بعد ثلاث اسابيع عرس سيف ..ومريم ما خلت سوق ما راحت له...تتسوق بكل فرح انها اخيرا بتتزوج حبيب قلبها..اللي كانت تحلم به من يوم عرفت معنى الاحلام..وفي العالم الثاني عالم القهر والدنيا التعيسه والشقا كانت ظبيه وامها بعدهن ما سارن السوق ولا سون أي شي ..وفي ليله حاره مووت واحر منها حرارة القهر والضيم في صدر ظبيه الساكته اللي حقها يضيع من الدنيا بكل سهوله..كانت يالسه ويا عيسى في حجرة احمد..
ظبيه: عيسى انا بعدني ما فصلت شي حق عرس سيف...
عيسى: ظبيه انا ما اقدر اظهرج من البيت بدون اذن ابويه وهو مب طايع..
ظبيه بتذمر: لين متى ما بقى شي..
عيسى: ما ادري تصرفي ويا ابوج..
ودخل احمد...وطلعت ظبيه...
احمد: حرام عليكم والله هالبنت انحرمت من كل ملذات الحياة..متى بتعيش دنياها مثل كل البنات..حتى اللبس الزين محرومه منه...
عيسى: بس لا تكبر راسها هي روحها هاديه لا تعلمها الكلام..
احمد:لين متى يا عيسى..هي بنت نفسيتها وايد بتتعب محد عندها ترمسه ما عندها ربع غير ريم ودانه..وهذيل بنات عز كل وحده مشغوله في دنياها..
عيسى: بس خل عنك الرمسه والله نحن مفروض ما نشفق على حد نحن ندور على اللي يشفق علينا...
احمد: بس هاي بنت نحن شباب نروم نطلع في أي وقت ونسولف ويا الشباب والربع..وعندنا قوة تحمل..بس هي بنت وايد حساسه..
عيسى: ابويه ربى ظبيه تكون قاسيه وما تعرف الرحمه ولا المشتكى..
احمد: يالله متى بتخرج من المدرسه وادخل الكليه والله بستأجر لي شقه في العين هناك..وبشل ظبيوه وامايه وياي..وخله هالهرم يتم هني لروحه..
عيسى: هه احلامك كبيره..والله ما يخليك..
احمد: لين يي ذاك اليوم بذكرك بكل شي..
.....................................
ام ظبيه وايد تعبانه وحرارتها مرتفعه وتتنفس بصعوبه..في ظهرها الالام شديده ما يطيقها بشر..ولا يتحملها انسان..تتأوه وتتألم وقلبها يدق بسرعه....بس والله ما هزت شعره في
بو سيف..ودخل الحجره وظبيه واحمد يالسين عندها..
بوسيف: يالله يا ام سيف قومي خل عنج الدلع..ما فيج الا العافيه..
احمد: ابويه امايه تعبانه وايد وحرارتها مرتفعه..بتوديها المستشفى ولا لاء..؟؟
بو سيف: يا احمد كم مره بقولك لا تتدخل في اشياء ما تخصك...
احمد: بس هاي امي يعني تبيني اشوفها تموت ولا اسوي شي..شو قالوا لك نذل..؟؟
بو سيف بعصبيه: اطلع برا من حجرتي...
ظبيه وخلاص طفح الكيل بصوت عالي: بس بس..انتوا ما تحسون..ابويه ود اميه المستشفى دخيلك امايه تموت..دخيلك..
بو سيف: والله ما اوديها بطايقكم الصحيه منتهيه..حق شو ادفع 100 درهم ..عشان غرشة شراب وخمس حبوب بندول..اتصلي بجيرانكم يمكن شي عندهم..
احمد: ابويه فديتك انا بوديها المستشفى وانا بدفع الله يخليك...
بو سيف: لاء يعني لاء..
ظبيه وكل قهر الدنيا بعيونها: اذا صار في امايه شي عمري ما بسامحك..
هني بو سيف ما قدر يصدق ان ظبيه هي اللي ترمس..وما صدق خبر ورفسها بريله رفسه خلتها وهي يالسه تطيح على ظهرها..وتبكي على حظها في الدنيا بكا مرير..ما بكته عذارء ..ولا يتيمه..
بو سيف: جب ولا كلمه وقومي جلبي ويهج..حمدوا ربكم اني مسكنكم في بيتي ماكلين شاربين بدون ما تسوون لي شي..يالله برا اظهروا ابى ارقد..
ظبيه وهي متقطعه من الصياح: انا ..انا بت...بتم عند اماااايه..
وقرب منها ورفسها مره ثانيه..وهو يصارخ: يالله طلعي مب ناقصني الا انتي..يالله..برا..
وتم يرفسها بريوله وهي كل ما يت بتقوم ما تقدر ويرافس فيها لين ما وصلت عند باب الحجره زحف وهو يرافس فيها بدون رحمه..ويوم ظهرت شوي من الباب ..صكر الباب وكان الباب بيصك عليها لين ما ظهرت برا..وتمت ظبيه طايحه على الارض تصيح..واحمد ما قدر يمسك عمره ودمعة عينه بس ما قدر يسوي شي..وطلع فوق حجرته..وتمت ظبيه مرميه على الارض جدام حجرة امها تصيح..وتبكي حظها وظلم الدنيا وقهرها..والدنيا والضيم..بكت من الخاطر وتم تقول بينها وبين نفسها دعوات ما يحس بها الا رب العالمين...وتصيح صياح من الخاطر..
ورقدت مكانها من الضيق والقهر ومن كثر البكاء...ورد عيسى وسيف من برا وشافوها...
عيسى مسك ايدها وهزها شوي: ظبيوه ..ظبيه قومي ...
سيف : ظبيه قومي حجرتج..يالله انتي وين راقده..؟؟
وقامت ظبيه وهم ما شافوا ويهها واول ما رفعت راسها وشافت عيسى ولاول مره عقت عمرها في حظنه وتمت لاويه عليه..تبكي بكل حرقه ..وبصوت يهز النفس..وهو منصدم مب فاهم شو السالفه ويطالع في سيف اللي تم مبطل عيونه مب فاهم شي..وحس فيها عيسى ولوى عليها بس عسب يحسسها بالراحه شوي..وبعدها شوي عنه..
عيسى: يالله ظبيوه اذكري الله شو فيج..
ظبيه: امي امي يا عيسى...
سيف بخوف: شو فيها...
وخبرتهم السالفه...ودقوا الباب بس ما فتح لهم..وتموا يتريوا واخر شي طلعوا فوق كلهم..وكل واحد سار حجرته..وما يا ظبيه الرقاد وعاف النوم عيونها..وتفكر في امها وحبيبة قلبها..الوحيده اللي تحس فيها...وتمت تدعي ربها طول الليل وتتريا الشمس متى تشرق عشان تنزل وتشوف امها..
............................
في اليوم الثاني..قامت ام سيف بخير ما فيها شي ونزلت ظبيه الساعه 7 من الخوف تدور امها..ويوم شافتها تسوي شاي في المطبخ حق بو سيف...لوت عليها ودمعة عينها..
ظبيه: امايه وايد خفت عليج..
ام سيف ويهها شاحب: ما عليه يا بنتي لا تشغلين بالج ما فيني الا العافيه...
وسارت ام سيف حجرتها وحطت لابو سيف الشاهي وطلعت عند بنتها تسولف وياها..
ام سيف: ظبيه يا بنتي والله ريلي تعورني ما ادري بلاها..يمكن من ظهري..
ظبيه: امايه خلي الشغل الزايد والله هلكتي عمرج..
ام سيف: اذا ما اشتغلت ببيتي منو تبيني اعتمد عليه ..باجر بتخلص الاجازه وبتردين للجامعه..
وعدلت ظبيه قعدتها وشوي ارتفع ثوبها من تحت وبينت ريلها..المهم نزلت ظبيه ثوبها على ريلها ولا حطت شي ببالها..
المهم ان ام سيف تمت تراويها ريلها وتقول: هني يعورني يا ظبيه وايد..
وتمت ظبيه تهمز لامها..ورفعت ام ظبيه شوي ثوب ظبيه من على ريلها وبينت ساقها تبي تراوايها وين الالم بالضبط ..
ام سيف: هني يعورني يا ظبيه...
ظبيه: سلامتج يا اغلى ام في الدنيا ما تشوفين شر..
وشهقت ام سيف: ظبيه شو هاه اللي بريلج..؟؟ متى طحتي..؟؟
ام سيف كانت راقده من الحمى وما حست شو سوا ابو سيف في ظبيه بالليل..وانصدمت من البقع الملونه في ساق ظبيه اللي مثل الثلج..
ظبيه: لا امايه ما شي بس طحت من فوق الدرج امس..
ام سيف: ليش يا بنتي ما تنتبهين لعمرج الله يهديج...
ظبيه: ان شاء الله امايه بهتم بعمري بس قولي هالرمسه لعمرج..
وتمت سوالف ويا امها...لين ما نزل احمد وتم يالس عند امه يسولف وياها...
..........................

الحلقه العاشرة...
اليوم عرس سيف ..ومحد حضر غير ناس ينعدون..مريم ما شاء الله عليها كانت روعه في روعه..وامها كانت شاله الدنيا فوق تحت من الفرحه بنتها الوحيده وحبيبتها..واخيرا عرست...وام ظبيه الطيبه الهاديه.. كانت فرحانه ومب شالتنها الدنيا ...وفي دنيا ثانيه ظبيه في عالمها المأساوي تحاول تبتسم غصب..مع انها مب قادره تحط عينها بعين حد ..كانت ظبيه مثلها مثل أي وحده مدعوه للعرس ولا كأنها اخت المعرس...مسكينه ظبيه ضحيه لظلم الدنيا وقسوة ابوها..وعجز اخوانها وضعف امها...هاي هي الدنيا طويله فيها لحظات المعاناه ومثل سحابة الصيف لحظات الفرح فيها..
وانتهى العرس ..والعروس روحت وياهم بس مب في فندق الانتر ولا برج العرب..العروس بتبدا حياة قاسيه جديده..روحت معاهم البيت وبتقضي اول واحلى ليله في بيت اهل ريلها..
...............................
مرت الايام وسيف مستانس ويا حرمته اللي مدلعه اخر دلع ومحد يقدر يتدخل في حياتهم..وكانت ظبيه وامها مثل الخدامات لحرمة اخوهم..اللي ما كانت ترفع أي شي عن الارض ..لانها عروس..وطالت الايام لين ما قربت الاجازه تنتهي..والجامعه بتبدا...وفي غرفة بو سيف..
ظبيه بهمس الضعفاء: ابويه فديتك ودني بوظبي بغيت اسير اتشرا لي شوية ملابس للجامعه..
بو سيف ساكت وما رد عليها...
ظبيه: دخيلك ابويه...
بو سيف: لا تخليني اقوم واخذ كل اللي في الكبت واحرقه بالنار..ما يسدنج خلاص خريجه ومن اربع سنين ونحن على هالحال..البسي من اللي عندج...واذا ما كفاج قولي لجيراننا يعطونج بدل مايتبرعون للفقراء في اخر الدنيا..
ظبيه: انا مب يتيمه انا عندي ابو ليش اطلب من الناس..
بو سيف: اسكتي وطلعي من عندي خليني على راحتي..بعدين انا ما عندي فلوس من وين اشتري لج؟؟؟
وطلعت ظبيه من عند ابوها..
...........................
في بيت بو حمدان كات عليا بعدها زعلانه من حمدان على اخر موقف استوى من بينهم يوم رمس بطريقه بايخه على ظبيه..وشوي باب الحجره مب مبند وهي يالسه تشتكي لوحده من ربيعاتها وتخبرها عن ظبيه الانسانه الغامضه...مر راشد تؤام عليا من عند الغرفه وبدون قصد التجسس لفتت نظره السالفه وتم واقف ومتصلب مكانه..وسار حجرته وقفل عليه الباب...وتوه راد من عند الشباب...ويلس في غرفته يتذكر ماضي طويل بينه وبين انسانه حبها من كل قلبه واجبرتها ظروف اهلها تاخذ ولد خالها...وتنهد من خاطره وتمت سالفة ظبيه عالقه في باله ما انشلت ابد...
"صدق معقوله في ناس جي عايشين حياتهم..يعني هاه بيت جيراننا الهادي اللي ما يخصه في الناس.. فيه ناس يعانون بهالشكل.."
وتم راشد يفكر في الدنيا وكيف تظلم ناس وترحم ناس وقام وسار لحجرة علياء ويلس عندها..
راشد: عليووه انا سمعتج وانتي ترمسين ويا ربيعتج عن بيت جيراننا..
علياء: زين ويعني؟؟
راشد:لا بس والله وايد تأثرت...
علياء تتنهد: خلها على الله يا راشد والله انها شاغلتني اكثر من شموس اختيه..
راشد: ليش جي هم يعيشون...؟؟
علياء: بس قضاء وقدر...
راشد: حرام والله ...الدنيا ظالمه...
وتدخل شمسه...
شمسه: افففففف ملل راشد ابي اروح المسبح...
راشد: اسمع انتوا انا ارمس وين وهاي كيف تفكر...
وطلع راشد ...
شمسه: شوفيه انا شو قلت الحين..
علياء: ما شي اذا تبين تروحين المسبح خذي اسووم وياج..
شمسه: زين خلاص اول ما يأذن المغرب انا برد..
...........................
ام ظبيه وايد تعبانه واايد ومب قادره تتنفس...وحرارتها مرتفعه..وعيالها ولا واحد منهم في البيت ...تتنفس بصعوبه..تتنهد بألم و ظبية واقفه عندها لا تلفون ولا اخوان ولا ابوها موجود..ظبيه خلاص بتموت من الصياح وزايغه على امها اللي تمت ترجع وتكح وتكح وحست ان روحها بتطلع...ودخل بو سيف...
ظبيه: ابويه دخيلك امايه بتموت فديت روحك ودنا المسشفى امايه بتموت...
ونزلت مريم وشافت حرمة عمها على هالحال...وما قدرت تمسك عمرها وتمت تصيح من الخاطر رغم ان مريم كانت بمنتهى السخف تتعامل مع ام سيف..بس ما هان عليها المنظر ودقت لسيف وقال انه بعيد وما يقدر يوصل الحين..وما طرا على بالها غير مايد اخوها ودقت له وما صارت عشر دقايق الا ومايد واقف على الباب..ورفعت ظبيه امها من على الارض ولبستها هي ومريم عباتها وطلعوا وياها وابو سيف في حجرته ما يدري بشي...ولا جان ذبحهن كلهن على الباب...مع مايد...
ووصلوا مستشفى الجزيره اللي دخلوها على طول غرفة وسووا لها فحوصات واشاعات..وعطوها بعض الادويه والحبوب...وطلبوا انها تبات عندهم بس ظبيه ما طاعت وخافت من ابوها..وردوا للرحبه..
وفي الدرب كانت ظبيه طول الوقت تصيح وهي عارفه ان نهايتها الليله على ايد ابوها...بس ما كانت خايفه من شي كثر ما هي خايفه على امها..
مايد كان طول الوقت مشغول مع ظبيه ويسمعها وهي تبكي بصمت..متقطع من داخل مب قادر يسوي أي شي حتى من كثر الالم في نفسه مب قادر حتى يقولها لها يا ظبيه اسكتي..
..............................
الساعه الحين تسع ونص بالليل...واول ما وصلت سيارة مايد عن بيت بوسيف كان الباب مبند..ونزل مايد ودق الجرس لين ما فتح له احمد..اللي كان ويهه معتفس شوي..ويوم شاف احمد مايد وايهه وعقب فتح الباب ودخلت سيارة مايد لين باب الصاله...واول ما نزلت ظبيه وشافت احمد طالعها بنظرة خوف وكأنه مشفق على اللي بتشوفه عقب ما تدخل البيت...
ظبيه كانت حاسبه الف حساب لهاللحظه...ومسك احمد ايد امه ودخلها الصاله ونزلت مريم وسارت صوب باب الصاله تفتح لام سيف...
ظبيه ومايد تموا شوي في الحوش...
مايد: ظبيه هوني على نفسج..
ما ردت عليه ظبيه ...بس قالت له وهي سايره داخل..ومعطيتنه ظهرها..
ظبيه: مشكور تعبناك ويانا...
ومشى مايد صوب سيارته بيروح وظبيه دخلت الصاله وطلع عيسى يركض ورا مايد...عشان يدخل...
دخلت ام سيف حجرتها وشافت ابو سيف يالس على طرف الشبريه ويطالعها بنظره كلها شر وحقد...وكانت متسنده على كتف احمد..اللي ساعدها تيلس شوي..
وقام بوسيف وقبل يقول أي كلمه دخل سيف عند امه وطالع ابوه ..وقال له كلام كله تحدي وقوه ..
سيف: ان لمس حد شعره من امايه لا يلوم الا نفسه ولا يزعل من اللي بييه..
كان الكلام موجه لابوه اللي طلع عشان يفك حرته في ناس مالها حد غير ربها...وشاف ظبيه نازله من فوق عقب ما عقت عباتها وغيرت ملابسها...واول ما شافته اترجفت من الخوف ومسكها وهي على الدرج وسحبها من شعرها..وفك حرة الساعات اللي طلعوا فيها في ظبيه المسكينه..كان يضربها بقوه وبعنف وهي ساكته حتى النفس ما ينسمع منها...ويضرب بايده على كل مكان بجسمها..
بوسيف: يالخايسه وين سرتي هاه وقمتي تطلعين عن شوري ...اليوم اذا ما شربتي من دمج ما كون بو سيف..
طاحت ظبيه على الارض..وتنهدت بس دموعها مثل المطر ودخل عيسى ومايد وشافوها طايحه على الارض وهني مايد انصرع ما عرف شو اللي مستوي وعيسى ولا تكلم لانه عارف شو بيتسوي قبل لا يستوي..
كان على ظبيه انها تكون القربان في العائله واي تعب او ضيق في أي حد كان على ظبيه انها تتحمله..وتعرف مسبقاً انها محطة تفريغ الهموم..
كان مايد يشوف ظبيه راكعه صوب الارض تطيح دموعها على ارضية الصاله اللي مب مفروشه..وما قدر يتمالك نفسه وقرب منها ومسك ايدها ورفعها فوق واول ما رفعت راسها وشافته سحبت ايدها وبكل حرة في قلبها ومن خاطرها طلعت صرخة مظلومه من قلب كسير مجروح مثخن بالجراح...
ظبيه والدمع مالي عينها وترتجف من الضرب: هد ايديه مالك شغل فيني ..انت شو يالس تسوي هني ..تعال واتشمت ما بقى غيرك..خلاص من اللي ما سوا له دور فيني..
وقبل تكمل ظبيه كلامها كانت في صفعه قويه يايه على ويهها من ايد جبارة ايد ابوها اللي ما تعرف الرحمه طريق لقلبه...تسكتها..وتردها لسابق عهدها كتومه ما تعرف الكلام..
ظبيه ما لقت حد تستقوي عليه وفكت حرتها في مايد اللي ما قدر يمسك نفسه وطلع برا البيت ..ما يدل الدرب وين...
ظبيه طلعت فوق وعيال بو سيف دخلوا عند امهم وتموا يسولفون وياها ويتحمدون الله على سلامتها..
ام سيف : وين ظبيه يا احمد..
احمد نزل راسه ولا تكلم بس طالع في عيسى اللي تدارك الموضوع: امايه ظبيه وايد تعبانه سارت ترقد...
ودخل بوسيف وقاموا كلهم من عند امهم عسب ترتاح وترقد..وطلعوا حجرهم..
ونامت الليله كل العيون..وبقيت ظبيه بروحها كالعاده تبكي بصمت الضعفاء وما قدرت حتى تطلع الصوت وهي تبكي من الخوف من ظلم الايام.
............................................

الحلقه الحادية عشر...
كانت صوره ظبيه المتحطمه المتهالكه وكلماتها الاخيره ما فارقت ثانيه افكار مايد..يفكر كيف ظبيه الانسانه اللي وهبها حبه من ربى الحب في حنايا صدره كانت تنهان جدامه ولا قدر يسوي أي شي...قاعد يتخيل كيف يوم قرب منها صرخت في ويهه..."ليش يا ظبيه شو كل هالكره ..عمري ما اذيتج ولا قلت لج أي شي يزعل..وهبتج عمري وايامي..ليش يا ظبيه والله اني احبج حب ما وهبته بشر.."وقطع تفكيره دقات تلفونه ورقم غريب...
مايد: الو السلام عليكم..
الدكتور: وعليكم السلام معاك مستشفى الجزيره..
مايد: اهلين اخويه..
الدكتور: مرحبا ..بس حبيت احكيك عن الست اللي جبتووها لعندنا من يومين..
مايد: هيه هاي عمتي شو بلاها..؟؟
الدكتور: لا ما فيي احكي بالتلفون ممكن لو تكرمت تجيبها للمستشفى...؟؟
مايد: عسى ماشر يا دكتور شو طلع عندك بالاشعه..؟؟
الدكتور : يا ابني تعال بكره ع الساعه 9 لازم نشوفها ما بيصير اعطيك بيانات أي مريض بالتلفون..
وصكر مايد من عند الدكتور ودق لاحمد وقاله السالفه واتفقوا باجر يمر عليهم مايد ويسيرون المستشفى..
...................................
في بيت بوحمدان ..راشد لزقه في عليا وكل شوي يتخبرها عن ظبيه وبدا الولد يستهبل وشكت اخته في تصرفاته...
علياء: رشووود اصطلب خل عنك الخبال...
راشد: لا بس جي اتخبر من متى ما شفتيهم..؟؟
علياء: والله انيه احس بالحسافه من زمان ما سيرت على ام سيف..وحليلها يتها فترة تعبت فيها...
ومرت عايشه من عندهم..
عايشه: شو رايج نسير لهم باجر المغرب..
علياء: ان شاء الله اذا ما كان عندنا شي...
راشد: عادي يدخلوني ..؟؟
علياء: تخبلت انت .؟؟؟
عايشه: حديقه هي ولا متحف يتنقون بالاعمار ...
وتموا يضحكون ويسولفون..
.............................
ظبيه يالسه في حجرتها تبدل ملابسها...بس مب مصكره الباب ووقفت عدال المنظره قبل تلبس ثوبها..ويلست تطالع كتفها وشافت البقع المزرقه والخضراء وبكل الالوان والدم المتجمع في جسمها وتنهدت وهي تطالع....وفجأه بدون أي استئذان انفتح باب الحجره وهي مب لابسه غير ملابسها الداخليه...دخل عليها ابوها وهو ماسك عقاله...وبحركه سريعه حطت ايدينها مثل الطفله على صدرها وحظنت عمرها تبي تستر نفسها...
بو سيف: انتي شو يالسه تسوين في الحجره من ساعه ازقرج وليش قافله الباب...؟؟
ظبيه وهي ميته من الرعب: مب قافلتنه بالمفتاح والله بس صكيته شوي لين ما ابدل...
وبالعقال على جسمها ولا احترم حرمات دينه والبنت مب لابسه الا اللي يستر عوراتها...وعلى جسمها الضعيف المتهالك ضرب لين ما قالت بس...وطلع...
بو سيف وهو واقف عند الباب: بس هاه عسب ما تقفلين الحجره ونحن في البيت...
وطلع من عندها...ظبيه على كل اللي يصير فيها بس تبكي بصمت..دموعها بحر بدون أي صوت...بلعت ريقها بصعوبه...ولبست ثوبها..واول ما نزل الثوب من على رقبتها حست بألم فضيع وقامت ببقايا جسد تتنفس بكل صعوبه...وفتحت باب الحجره وشافها احمد..ونزل راسه ومشت جدامه..وشاف رقبتها من ورا...مسكها من ايدها..ونزل شوي ثوبها من ورا يبي يتأكد من شي...
احمد وهو متجمد مكانه: ظبيه شو هاه اللي برقبتج؟؟؟
ظبيه بهدوء يذبح القلب: ما شي ليش شو تشوف..؟؟
احمد: ظبيه ردي الحمام وتغسلي ملابسج كلها من داخل متخيسه دم في رقبتج من ورا جرح شوي عميق...
وردت ظبيه الحمام وغيرت ثيابها ومسحت على الجرح بالماي...ووقفت في الحمام تطالع المنظره وتشوف ويهها ودموعها مثل المطر من الالم وبدون تفكير مسكت علبة الكلوركس وفتحتها وقربتها من حلجها...
ووصلت بين شفايفها وتراجعت ونزلتها ...
" استغفر الله انا شو يالسه اسوي...ارجوك يا ربي سامحني "
وطلعت على طول من الحمام.
...............................
بالغصب طاع بو سيف يخلي ام سيف تروح ويا احمد المستشفى وحاولوا عسب ظبيه تسير وياهم بس ما خلاها...وفي مستشفى الجزيره في قسم الاشعه..الدكتور واقف مع احمد وام سيف...
احمد: هاه دكتور ان شاء الله خير...
الدكتور: انتوا وين من زمان...بصراحه أي حاله جديده تيي على الوالده انتوا السبب فيها...
احمد: زين دكتور باختصار شو فيها...
الدكتور : انا ما بحكي لك ولا شي ...الدكتور جابر هو بيحكيك اصبر شوي...
ويدخل بعد شوي دكتور مواطن ..باين عليه جداً مثقف اول ما شاف احمد ابتسم له وسلم عليه...
الدكتور جابر: انت ولدها؟؟
احمد: هيه يا دكتور والله فوادي ماكلني ارمسوا شو فيها..
الدكتور جابر: اذكر الله ..وقل لن يصيبنا الا ما كتب الله لنا...
احمد: ونعم بالله..
الدكتور جابر: يا احمد يا خويه الوالده انسانه اكيد تجهد عمرها اجهاد فوق الحد المسموح به لانسانه في عمرها...المهم بعد الفحص والتحاليل والاشعه بينت الصور ان امك حملت شي ثجيل في فتره شويه مب قريبه بس ما تداركتوا الموضوع..وصار اللي صار...
احمد: شو صار يا دكتور..؟؟
الدكتور جابر: في مفصل او عظم في العمود الفقري في الفقرات طلع على اللي فوق ويحتك فيه..وهذا يسبب لها الم شديد في سيقانها...وطبعاً انتوا تأخرتوا بعرضها على الطبيب..وهذا ادى الى ان العظم اللي في الظهر تآكل وبدا اللي تحته بنفس الحال...ابى اختصر عليك اكثر..امك معرضه للشلل الكامل في أي وقت..وعلاجها متأخر وما يساعد الاطباء...حاولوا انكم تجنبوها الزعل والارهاق قدر الامكان....
احمد بحزن شديد: ان شاء الله دكتور..
طلع احمد من عند الدكتور وصدره ضايق من خوفه على اغلى ما بقى له بالكون... وتم يفكر كيف يقولهم بالبيت ان امه محتاجه الرعايه والحنان..والعلاج اللي اكيد محد بيوفره لها...
...........................
مايد في حجرته يالس يفكر ويفكر مب عارف شوي يسوي...ما يقدر يتخيل كل ما حاول ينسى مب قادر..كيف كانت اخر مره شاف فيها ظبيه..وحس قلبه متقطع..ومب عارف كيف يسوي...وتم يفكر يخطب ظبيه بس عشان ترتاح من همومها وتغير حياتها للاحسن..بس حط في باله ان ظبيه بترفض هالشي..وقال ما في أي حل الا انه يقعد ويتفاهم وياها او يخلي مريوم ترمسها...
في بيت بو سيف كانت ام سيف يالسه مع ظبيه وشوي الا واحمد ياي من بعيد...
احمد: امايه تعالي في حريم عند الباب..
وطلع بو سيف من حجرته: من اللي بيينا الحين عافانا الله محد بيي الحين الا واحد يبي يتعشى...
ام سيف: حيالله من يانا ان بغى عشا ولا ما بغى..ظبيه سيري هذيل بنات بو حمدان دخليهن ميلس الحريم وانا بسير المطبخ...
احمد : لا ظبيه انتي روحي المطبخ وامايه بتسير لهن..
وقامت ظبيه للمطبخ..
ودخلت ام سيف ميلس الحريم مع علياء وعايشه وشمسه الصغيره...
ودخلت ظبيه وسلمت وسوالف وعقب طلعت من عندهم ام سيف..وتمت عايشه تسولف هي وعليا مع ظبيه..وشمسه معاهم..
علياء قلت قبل انسانه شفافه حست ان ظبيه شاله الدنيا على راسها من الهم..وقلبها متقطع من الحزن..ما قدرت علياء تسألها عن أي شي لان عايشه وشمسه موجودات...
بس يوم بيروحون وظبيه واقفه معاهم عند الباب..وشوي بعيد عن شموس وعايشه..
علياء: ظبيه غناتي بليز عشان خاطري اذا في أي شي قولي لي لا تكتمين بقلبج نحن اكثر عن خوات..
ظبيه باستغراب من شفافية قلب عليا اللي تحس بكل الناس: لا عادي صدقيني ما في شي...
علياء: انا اختج الكبيره وصدقيني يا ظبيه بكون لج ظهر وسناد بس ثقي فيني...
ودمعت عين ظبيه المتماسكه لاول مره..وحست بحنان علياء يسري بدمها....وهني لاول مره بعد على الباب اللي برا لوت علياء بقوه وحنان على ظبيه جدام خواتها اللي استغربوا من موقف علياء...بس عايشه ابتسمت وما استغربت هالتصرف لانها تعرف حنان علياء وامومتها وكل شي من طيبة قلب وعطف على كل الناس...
ظبيه طلعت عمرها من بين احضان علياء وابتسمت لها ..
ظبيه: وعد أي شي يستوي بقولج عنه صدقيني...
علياء: وهذا اللي اباج توصليله...
وطلعت علياء وعايشه وشمسه ..وردت ظبيه البيت لاول مره مبتسمه..وحست بخاطرها ان في حد بهالكون يفكر فيها..
..........................

الحلقة الثانية عشر...
مرت الايام مثل ما هي وحالة ام سيف مترديه و في سوء تزداد..بس ظبيه كانت لها السند والعون..ظبيه رغم كل اللي يصير فيها..بس بدت ترتسم على شفايفها ابتسامة امل ..بوجود علياء الطيبه..ومن هناك بدت الدراسه وبدا دوام ظبية اللي ما كانت مسويه أي شي ولا مستعده ولاحتى عندها خيط يديد..بس ظبيه انسانه متفوقه في دراستها وعمر ظروفها ما اثرت عليها...في الرحبه كسبت ظبيه حب البنات اليداد في الباص..وكلهم كانوا نفس تفكيرها البسيط الهادي ومحد كانت فيهم تنغص عليهم...كانت الساعه ونص اللي تقضيها ظبيه في الدرب لبيتهم تمر مرور سحابة صيف واستهبال ويا البنات ...ومرت الايام ..
..................
مرت الايام وراشد اعجابه بظبيه يكبر ويكبر...وحركاته بدت واضحه..ابتداءً من وقوف موتره جدام البيت الصبح يوم يي الباص...لين المغرب يوم موعد رجوع باص ظبيه ووقوفه على الدريشه يترياها يوم تنزل....
شمسه: هاه مسكتك شو تسوي...
راشد بارتباك: ههاااي غربلج الله يا شموس والله زغت تحريتج عويش ولا عليوه ما فيني على المحاضرات..
شمسه: ليش تطالع بيت الناس مب عيب عليك..
راشد: هيه سمعوا انتوا انا مفتك من عليوه بتيني انتي...يالله انجلعي من ويهي..
شمسه: زين زين وانا يايه بعد بقولك شي مهم...
راشد: شو يالله قولي اسحب رمستي..
شمسه: كنت يايه بقولك اذا تبي أي مساعده او أي خدمات انا جاهزه..تراني بعد احب ظبيوه..
ضحك راشد لين ما قال بس: صدج انج مب هينه يا شموس..اذا احتجت أي خدمه مني مناك..انتي اول وحده صدقيني..
شمسه: كم بتعطيني..؟؟
راشد: اللي تبين ؟؟
شمسه: ابى اسير وندرلاند..
راشد: بس ما طلبتي يا شموس تم والله..بس بنشوف شو نوع الخدمات اللي تقدمينهن..
وسارت شموس من عند راشد..اللي تولع قلبه بظبيه...وصارت سالبه منه التفكير..
.......................
في اليوم الثاني في الصبح كانت ظبيه اخر بنت يمر عليها الباص..وركبت وراشد يالس يراقب وهو يالس بموتره..
المهم في الباص...
ظبيه: اففففف شو هالضيج...؟؟
مها: اسمع انتوا من يشتكي !!!
نوره:اول مره ظبيوه تتأففين من شي....بس سمعي بتخبرج عن شي..
ظبيه: هاه قولي..
نوره: شو سالفة هالموتر اللي كل يوم واقف حذا بيتكم...
ظبيه: وانا اشدراني..؟؟
نوره: حركاااااات شو ما تدرين...هاه قاعد يغازلج..
ظبيه بعصبيه: بس سكتي ما حب هالسوالف دخيلج..
وسكتت نوره يوم حست ان ظبيه عصبت من السالفه...
ومر الدوام على احسن حال ووصلت ظبيه البيت واول ما نزلت من الباص سار عنها ...ولحق راشد الباص..
وفي اخر لفه على اخر شارع بين الفلل اعترض راشد الباص..ووقفه على الطرف ..بس ما في حد كان في الشارع ونزل راشد عند راعي الباص..
راشد يستهبل: اقول رفيق وين منطقه N ..؟؟
راعي الباص: انت ما يعرف وين...
راشد: لا ابيك تعلمني تراني غشيم شراتك...
راعي الباص مب فاهم شو السالفه ومستانس مسوي فيها بطل خلاص من قده صار يدل الناس واهل البلاد على بلادهم..المهم ان راشد تم يلعوز راعي الباص وكل ما راح يمين سار شمال لين ما غابت الشمس....ووقف راعي الباص..
راشد: اقول رفيق ...
راعي الباص: شو يسوي انت حرام بابا انا لازم يكون في ابوظبي الحين انت سوي تأخير واجد..
راشد: بس اسكت جب ولا كلمه...المهم اقولك تلفونك فيه رصيد..
راعي الباص: في خمستاش درهم..
راشد: زين زين تبيني احط لك فيه 200 وبعدين انت يكلم بلاد مال انته ويكلم بتشا بعد...؟؟
راعي الباص ما صدق خبر وتم شاق الحلج ووده من فرحته يسير يدهن شعره بفازلين...
راعي الباص: ايوه بابا الله يخليك...
المهم راشد قردن راعي الباص وتعرف عليه وصاروا حبايب وكل هذا لغايه في نفسه عشان يوصل لظبيه بأي طريقه لو شو ما صار...
....................................
في بيت بو سيف كان مايد عندهم ويا امه...وطول الوقت وهو يفكر في ظبيه اللي توها راده من الدوام وكل شوي قايمه وتسوي الشغل على راسها عشان امها المريضه ويشوف اخته اللي ما تدق أي شي من كثر ما يدلعها ريلها ...سيف اللي ما يختلف وايد عن ابوه..وتعشوا وعقب العشا تموا سوالف وضحك...وطلع مايد الحوش بروحه...ويلست مريم عند ظبيه...
مريم: ظبيه سيري رمسي مايد ظهر برا يبي يقولج شي...
ظبيه: شو يبي...؟؟
مريم: لو ادري بقولج بس المشكله اني ما ادري..
وطلعت ظبيه عند مايد ..وشافها وعرف ان مريم رمستها وسارت له..
ظبيه: خير يا مايد في شي..قالت لي مريامي انك تبيني..
مايد: ظبيه ممكن شوي اخذ من وقتج..
ظبيه: تفضل...
مايد: ظبيه ما ادري من وين ابدا لج..بس صدقيني والله اني بكل صدق احبج من خاطريه ومستعد اسوي أي شي بالدنيا عشان اشوفج مبتسمه وراضيه..بس في شي محيرني بالحياه وما ابى اتدخل فيه الا وهو غموضج...ظبيه كل انسان له خصوصياته سوري اذا انا مب ميمع الرمسه بس ودي اسألج شي يدور بالخاطر ..ليش ما تبيني جاوبيني ومستعد اسوي اللي تبينه...
ظبيه ما ردت عليه بس لفت ويهها بكل غرور صوب الباب...
مايد: ظبيه والله انيه ادور غلط سويته عشان هالمعامله اللي اشوفها بس مب عارف شو السبب..ظبيه قولي السبب وريحيني لا تفكريني عايش مرتاح..
ظبيه نطقت بعد طول صمت:تبي تسمع كل شي..؟؟
مايد بخوف: يا ليت...
ظبيه: مايد انا ما اريدك لا زوج ولا غيره وعمري ما حسيت بشعور الحب هاللي ترمس عنه..انا اصلا ما اعرف شو هو الحب ..مب عشانك ما تستاهل لا والله..بس لاني ما اناسبك دور على غيري صدقني ما نفع...
مايد: شو تقولين والله يا ظبيه ما ابي غيرج..ما ابيه..
ظبيه وفوادها متقطع من الحزن على مايد: ما اريد يا مايد وخلاص اخر كلام وبقولك شي انا من اليوم ورايح ما بظهر عليك ارجوك بعد عن حياتي...
نزلت كلمات ظبيه حمم بركانيه في قلب مايد اللي تحطمت احلام السنين في غمضة عين..وانتهى حلمه الوردي اللي بدا يرسمه من يوم عرف الدنيا من يوم دخل اول يوم المدرسه وبدا يفهم العالم...تبددت احلامه تبدد الغيم وقت بزوغ الشمس...وانهارت اجمل احلامه بضربة معول بارده من ايد ظبيه..
ودخلت ظبيه بكل برود وتم مايد برا ونادوا على امه وروحوا البيت..
...............................................
مرت الايام ووصلت الاخبار بسرعه ان مايد مسافر مصر يدرس ..وارتاحت ظبيه انه بيبعد...المهم ان ظبيه بدت تتقرب اكثر واكثر من علياء بس ظبيه بعدها ما تعرف أي شي عن سالفة راشد...لين ما يتهم شمسه مع البشكاره..يايبين لهم صحن ورق عنب ودخلت شمسه ويا الشغاله وشافت ظبيه وقربت منها..
شمسه بعفويه: ظبيوه عندي لج هديه..
ظبيه بغرابه: شو عندج..؟؟
شمسه وايدها ورا ظهرها: هذي لج ...
وعطتها وردة جوري من اللي زارعينها في حديقة بيتهم...
حبتها ظبيه : مشكوره حبيبتي...
شمسه: هاي مب من عندي..خمني من عند منو..؟؟
ابتسمت ظبيه: عليووه ولا عويش..
شمسه ببراءه وعفويه: لا هاي من عند رشود خويه هو اصلاً يحبج موت وكل يوم يتخبر عليوه عنج وهي تسولف له عنج وهو يتخبل وخلاف يقول لي سلمي عليها ..والله وايد يحبج..حتى انا بعد احبج مثله..بس انا اكثر شويه..
نزلت كلمات شمسه العفويه صاعقه على قلب ظبيه اللي تغير لونها وفرت الورده على الارض..ومسكت عمرها لا تصارخ على شمسه البريئه...
ظبيه: مشكوره وقولي لعلياء شكرا على كل شي واخوج وصلي له هالرمسه وقولي له ..صدج فقيره ومب بنت عز بس شرفي اغلى من كل اللي تحلم فيه...ولا تفكرني فقيره يعني سهلت المنال...
شمسه حست ان ظبيه معصبه وطلعت من البيت ووصلت كل الرمسه لراشد اللي طلب منها ما تقول شي حق البنات..وحس انه تصرف بسرعه..وتندم على اللي فات وقرر يقول لعلياء..
............................